Vawiin dt.08.02.2018 khan Sorkar hmalakna NEDP hnuaia project pawimawh tak ‘Development of Indigenous Technological Innovation in Mizoram (DITIM)’ hnuaia khawl hrang hrang dah khawmna leh siamchhuahna tur in, Innovation Facility Centre Building sakna tur lung chu Pu Lalsawta, Minister, Planning chuan Mizoram Secretariat Complex-ah a phum.

He programme hi Dr. C. Vanlalramsanga, Secretary, Planning Department chuan a kaihruai a, hetiang centre pawimawh tak sak a ni thei tur hi Mizoram tan a chhinchhiahtlak hle a, Mizo mipui tam takin lei rualrem an rah theihna tura rahbi pawimawhtak a nih thu a sawi. Mizo tualchher thilsiam chhuahthiam, Innovator ten he centre hi hmang tangkaiin an khawl siam chhuahte chu Industry lian zawkte nen a thawk hova hmalakna lian zawk a thlen theih a beiseiawm thu a sawibawk. He project-a hmalatu Mizoram Science, Technology & Innovation Council-a Chief Scientific Officer& Member Secretary Dr. R.K. Lallianthanga chuan Innovation Facility Centre(IFC) din chhohna tura a tir atanga hmalak dan report a pe a; project pumpui atan cheng nuai 667 ruahman a nih thu a sawi a, a satu atan contractor L.B. Associates-te chu thlan niin kumkhat chhunga peih hman tum a nih thu a sawibawk.

Mizo Innovator te aiawhin Pu Lalbiakzuala Ralte, Agarbati stick leh kuhva thelfaina khawltepawh lo siamchhuak tawhtu chuan thusawiin he centre hian Innovator ten harsatna tam tak an lo tawh tawh thinte a sutkian sak dawn a, khawllian pawimawh bik, mimalin an lei phak loh te center-ah hian a awmtawh dawn avangin an khawl part hrang hrangte chu phai pan buai ngaitawhlova he centre kaltlanga an siam chhuahve theih tawh a beisei thu a sawibawk a ni.

Science & Technology changtu Minister Pu Lalsawta chuan Innovation pawimawh zia leh India ram pawhin he lama hma a sawn thute sawiin khawvel ram za chuang zingah India ram chu Innovation lam teh naah 60-na a nih thu a sawi a. Ram thenawm China chu 22-na a nih mek thu leh anni umpha tur hian tan lak a la ngai nasa hle a ni a ti. Sorkar pawhin kan rama innovator te hi a ngaihsak hle a, theihtawpa tanpui a tum thu sawiin, chumi atan chuan he Centre pawh hi din a ni a ti. Innovation Facility Centre chhungah hian khawl hrang hrang a vir chi, a tat chi, a khawh chi, a sat chi te a awm dawn a, hengte hi hman tangkai chuan entrepreneurship lamah hma kan sawn phah dawn hle a ni a ti bawk. Minister hian NEDP chumi taima leh tangte puihna a ni tih sawiin theihtawp chhuah thin mite chu sawrkar tan pawh puih an phurawm hle reng a ni a ti.