March 20, 2017 : Mizoram Science, Technology & Innovation Council (MISTIC) leh Mizoram Mathematics Society (MMS) chuan Pachhunga University College-ah chawlhkar khat awh tur Mathematics Summer Camp an buatsaih a, Mizoram sorkara Chief Scientific Officer Dr. R.K. Lallianthanga'n a hawng. Dr. R.K. Lallianthanga chuan hna laknaa exam chi hrang hrang atan Mathematics a pawimawh tih sawiin, "Hna zawnna mai bakah, eng hna pawh thawkin, eng pawh ti ila, Mathematics thiam hi a pawimawh a. Tunlaiah chuan thil chik peih a ngai em em a, uluk taka ngaihtuahna seng thiam turin Mathematics zir hian nasa takin a pui thei a ni," a ti.

Chief Scientific Officer chuan, zirlai tan Mathematics thiam turin ngaihtuahna sen peih, chawh tam leh thiam loh zirtirtute zawh peih a pawimawh tih a sawi a; Mathematics Summer Camp chu hmang tangkai turin zirlaite a chah.

Mizoram Mathematics Society Secretary Dr. LP. Lalduhawma chuan tun tum hi Mathematics Summer Camp an buatsaih vawi hnihna a nih thu leh Camp chu zirlaite'n sikul chawlh an hman tangkaina tura duan a nih thu a sawi a, Class X-ah mi 53 leh Class XII-ah mi 14 admit an ni a, Camp chhung hian Mathematics topic hrang hrangah Mizorama Mathematics zirtirtu thiam tak takte'n zing dar 10 atanga tlai dar 3 thleng an zirtir thin dawn a ni," a ti.

Mathematics Summer Camp hi March 24 thleng neih a ni ang.