Vawiin ni 22.3.2018 khan Mizoram Science Centre leh Mizoram Science, Technology & Innovation Council, Directorate of Science & Technology-te huaihawtin Mizoram Science Centre, Beraw tlangah National Science Day pual Seminar leh Science Demonstration hun hman a ni a, Science hmasawnna lam buaipuitu leh thawktute bakah MHIP General Headquarters member-te an tel a ni. Seminar thupui hi ‘Science & Technology for a Sustainable Future’ tih a ni.

Planning (Science & Technology) Secretary Dr. C. Vanlalramsanga chuan Khuallian niin he hun hi a hmanpui a, Mizoram tana Science & Technology-in hmasawnna a thlen dan hrang hrangte a sawi a. Tunah hian Lunglei lamah pawh Digital Planetarium din tura hma lak mek niin, hei hi nakinah chuan Science Centre puitling a la nih theih tur thu a sawi. Mizoram Science Centre hian zirlaite zirna puihna atan science exhibits chi hrang hrangte hmangin hma a la thin a, zirtirtute leh tlawmngai pawl hrang hrangte nen pawh hma la ho thinin, science thiamna leh a pawimawhna hrang hrang zirna leh sawihona workshop leh seminar-te an buatsaih thin thu a sawi bawk. Nikum lamah Mizoram Upa Pawlte nen Arsi chungchang zirhonate buatsaih a ni a, tun tuma MHIP General Headquarters-te nen Seminar an han buatsaih leh thei hi a lawmawm hle a ni a ti. Hmeichhiate hi fate zirna kawnga tulpuitu leh buaipuitute ber an nih avangin Science zirna kawngah an thanharh a pawimawh hle a ni a ti bawk.

He Seminar hi Dr. R.K. Lallianthanga, Chief Scientific Officer & Member Secretary, Science & Technology chuan a kaihruai a. Science Centre din a nih dante leh Science Centre-a thil tangkai en tur chi hrang hrang awmte chanchin a sawi a. Ramngaw awmna gallery-te, Science thudik tarlanna hmun hrang hrang - Fun Science Gallery-te, 3D Theater-te, pawnlama intihhlimna chi hrang hrangte chu a duh apiang tan tlawh theih reng a nih thu a sawi a. Science Centre Auditorium mi 120 lenna pawh Conference leh tul dangah te hman theih reng a nih thu a sawi bawk. Beraw tlanga Science Centre hmunah hian Innovation Hub & Space Science Education Centre pawh sak zawh tawh a ni a, zirlaiten tangkai taka an la hman theih tur thu a sawi.

Seminar-ah hian Pi Lalrinnungi, Education Assistant chuan ‘Science & Technology for a Sustainable Future’ tih thupui hmangin thu a sawi a; Pu Lalrammawia, Education Assistant chuan Science Demonstration hun a hmang bawk. Pi Lalrinkimi, Education Assistant chuan he hun kharna atan hian lawmthu sawiin, Seminar-a tel zawng zawng leh a bik taka he hun hmanpuitu MHIP Branch zawng zawngte chungah lawmthu a sawi a ni.