Vawiin ni 26.4.2018 khan Patent Information Centre, Mizoram Science, Technology & Innovation Council, Directorate of Science & Technology-te huaihawtin Science & Technology Office Conference Room-ah World Intellectual Property Day 2018 pualin hun hman a ni. Kumin World Intellectual Property Day thupui chu “Powering change: Women in Innovation and Creativity” tih a ni.

Dr. R.K. Lallianthanga, Chief Scientific Officer chuan thu sawiin Patent Information Centre din chhoh a nih dan leh a hnathawh hrang hrangte a sawi a. He Centre hi mi tam takin an chhawr tangkai mek thu sawiin, ram hmasawn zelna atan pawh tun aia a la tangkai deuh deuh theih a beisei thu a sawi bawk. Mizoram chhunga zirna in sang hrang hrang parukah te Intellectual Property Right Cell din a nih tawh thu sawiin, chungte nen chuan tanghovin hma an lak ho thin thu a sawi a. Intellectual Property dan hrang hrang hmanga mimal thiamna te humhalh a pawimawh leh a tul zia a tarlang bawk.

He Seminar hi Pu Samuel Lalmalsawma, Senior Scientific Officer chuan a kaihruai a. World Intellectual Property Day hman tan a nih dan sawiin he ni hian a tum ber chu mipuite hnena Intellectual Property vawnhim a pawimawhzia hrilhhriat a ni a ti a, kum 2000 atang khan World Intellectual Property Organization-te bultumin khawvel hmun hrang hrangah hman tan a nih thu a sawi bawk.

Pu C. Laltlanzuala, Project Scientist, Patent Information Centre chuan thupui “Powering change: Women in Innovation and Creativity” tih hmangin presentation a pe a. Khawvel hmasawnna leh thiamna lama thanlenna kawngah hmeichhiaten an thawh hlawk dan a tarlang. Tun dinhmunah hian World Intellectual Property Organisation kaltlanga heng Science peng hrang hrang - Biotechnology, Pharmaceuticals leh Chemistry-ah te hian patent dilna thehlut hnem berte chu hmeichhiate an nih thu a sawi a, Republic of Korea-ah phei chuan Patent dilna za-a sawmnga zelah hmeichhiate an tel zel thu a sawiin, Mizo hmeichhe Scientist-te pawh an duai loh zia leh Science lairil lam luhchilh tak takte pawh an thahnem ta hle a ni a ti.

World Intellectual Property Day puala hun hmanna hian Directorate of Science & Technology hnuaia thawktu hrang hrangte an tel a ni.