Mizoram Science, Technology and Innovation Council (MISTIC) hnuaia Mizoram State Climate Change Cell leh State Meteorological Centre, Directorate of Science and Technology, Government of Mizoram ten Mizoram Sik leh sa chinchang an zir mekna peng khatah kum 2019 leh 2020 chhunga Mizoram ruahtui tlâk dan khaikhinna neih a ni a.

Kum 2019 khan chhinchhiah danin district hrang hranga ruahtui tlak dan chawhrualin Mizoram ah ruahtui 1906.87 mm kan dawng a. Chu chu kum sawm chhunga ruahtui tlak thin dan tlangpui 2286.18 mm aiin za zelhah 15.69 in a tlem zawk a. Kum 2020 khan chawhrual in 2113.79 mm tla leh in hei hi kum 10 chhung Mizoram ruahtui tlak thin dan tlangpui aiin za zelhah 4.97 in a hniam ve thung a ni.

Kum 2019 chhung khan district hrang hrang chawhruala ruahtui tlak ni hi ni 132.88 a ni a, hei hi kum 10 chhung a ruahtui tlak dan tlangpui ni 140.28 aiin za zelhah 4.77 in a tlem zawk a. Kum 2020 chhung khan district hrang hrang chawhruala ruala ruahtui tlak ni hi ni 144.50 niin, hei hi kum 10 chhung Mizoram ruahtui tlak dan tlangpui aiin za zelhah 3.6 in a pung ve thung.

Fur hun chhung (Monsoon) June thla atanga September thla chhung in kum 2019 khan Mizoram chhungah chawhrualin ruahtui 1398.33 mm a tla a. Hei hi kum sawm chhunga fur ruahtui tlak dan tlangpui 1558.26 mm aiin za zelhah 9.41 in a tlahniam a. Kum 2020 khan fur hun chhung hian 1304.68 mm ruahtui a tla a, hei hi kum 10 chhung a fur ruahtui tlak dan tlangpui aiin za zelhah 13.72 in a hniam zawk bawk a ni.

District hrang hrang a ruatui tla chhinchhiah te chawhrual in July ni 11, 2019 khan 57.20 mm ruahtui kan dawng a, hei hi kum 2019 chhunga ruahtui tam ber ni a ni a, May ni 27, 2020 khan ruahtui 78.56 mm tla ve leh in hei hi kum 2020 chhunga ruahtui tam ber ni a ni bawk.