NATIONAL SCIENCE DAY-2025 LAWM A NI
28.02.2025: February 28, 2025 khan National Science Day – 2025 lawmna hun Synod Conference Centre, Mission veng Aizawl-ah neih a ni. He hunah hian Prof. Lalnundanga, Registrar, Mizoram University chu khuallian niin Er. H. Lalsawmliana, Chief Scientific Officer & Member Secretary, MISTIC, Directorate of Science & Technology chuan he ni lawmna inkhawm hi a kaihruai a ni.
Dr. Davy Lalruatliana Senior Scientific Officer, MISTIC chuan National Science Day Report pein he ni puala hun hman dan hrang hrangte a tarlang a. Dr. Lalchhandami Tochhawng, Scientific Officer, MISTIC hnen atangin ‘Empowering Indian Youth for Global Leadership in Science & Innovation for Vikshit Bharat’ tih thupuia hmangin presentation ngaihnawm tak ngaihthlak a ni bawk.
Hemi ni hian Mizo Thalai Innovators ten an thil siamchhuah chi hrang hrangte pho chhuahna hun an nei bawk a, anni bakah hian Science Teacher Association Mizoram (STAM) te, Mizoram Remote Sensing Application Centre (MIRSAC) te, Science lam tui mite leh school hrang hrang atanga zirlaite leh zirtitute mi eng emaw zat an kalkhawm a ni.
He hunah hian National Science Day puala intihsiakna chi hrang hrang, 3rd Science Competition te, Poster making leh Video making competition tea tithate hnenah lawmman semna hun hman nghal a ni bawk.
- 3rd Science Competition hi zirlai naupang Class-VIII & X tana buatsaih niin mi 1500 vel zet an tel a ni.
- Poster Making Competition hi Junior leh Senior Category-ahte then niin ‘Science in Everyday’ life tih thupui hmangin intihsiakna hi neih niin, Divine Intervention School ten Category pahnihah te hian lawmman pakhatna an la ve ve a ni.
- Video Making Competition hi ‘Traditional Knowledge in Agriculture’ tih thupuia hmanga buatsaih niin College zirlai leh School naupangte tan buatsaih a ni a. College levelah hian Govt. Serchhip College ten lawmman pakhatna lain School-ah chuan Divine Intervention School ten lawmman pakhatna an la a ni.
