National Mathematics Day 2023

NATIONAL MATHEMATICS DAY 2023 LAWMNA HUN HMAN A NI

Aizawl dated the 20th December 2023: Vawiin ni 20 December 2023 khan Mizoram Science, Technology & Innovation Council (MISTIC) leh Mizoram Mathematics Society (MMS) te buatsaihin ‘National Mathematics Day 2023’ lawmna hun chu Mizoram Rural Bank Auditorium, MINECO ah hman a ni a. He hun hi hian Pu Lalmalsawma Pachuau, Secretary, Planning & Programme Implementation Department, Govt. of Mizoram chuan khuallian niin a hmanpui.

Pu Lalmalsawma Pachuau, Secretary, Planning & Programme Implementation Department chuan MISTIC leh MMS te tangkawpin Mathematics puala programme hrang hrang an buatsaih thei hi lawmawm a tih thu sawiin, Mathematics competition-a lawmman dawngtu zawng zawngte duhsakna a hlan bawk a. Zirlai kal khawmte chu an lehkha zirna kawngah zirlai awmzia tak tak hre lova zirna ‘blind by-heart system’ kalsana ‘application based’ a inzir kan mamawh tawh thu sawiin, competitive exam leh zirna sang zawkah pawh mathematics hi thil ril zawka ngaihtuah theihna, ‘objective thinking’ leh ‘analytical skill’ min petu ber a nih thu ama tawn hriat atangin a sawi bawk. Competitive exam-a Mathematics pawimawhzia sawiin, zirlaite chu Mizoram mai a duh tawk mai lo tur leh India ram pum huap inelnaa hming chhertu ni thei turin a fuih bawk a ni.

He hunah hian Dr. Davy Lalruatliana, Senior Scientific Officer, MISTIC leh Programme Co-ordinator ni bawk hnen atangin National Mathematics Day denchhena programme hrang hrang neih dan report ngaihthlak a ni a. Mathematics lama mi bikte chawimawina hun hman zui niin, Mizoram-a Mathematics Professor hmasa ber Prof. L.P. Lalduhawma bakah Mathematics-a Ph.D hmu thar mi 6-te hnenah chawimawina hi hlan a ni.

Hemi hunah hian Mizorama Mathematics intihsiakna lian ber, 15th State Level Mathematics Competition-a level hrang hrang Class 5, 8, 10 leh 12-a zirlai ti tha zual mi 40 te hnenah lawmman sem a ni bawk a. Dr. Mohan Khatri, Assistant Professor, Pachhunga University College hnen atangin Mathematics Day chungchang leh a pawimawhna presentation ngaihnawm tak ngaihthlak a ni bawk.

Er. H. Lalsawmliana, Chief Scientific Officer & Member Secretary, MISTIC, Directorate of Science & Technology (DST), Govt. of Mizoram chuan he hun hi a kaihruai a. He hunah hian Mizorama Science NGO hrang hrang te, Planning & Programme Implementation Department te, Science Promotion Wing (SCERT) te, Mizoram Remote Sensing Centre te, Mizoram Science Centre te, leh sawm bik mi 150 bawr vel an tel a. Pu Samuel Lalmalsawma, Principal Scientific Officer, MISTIC chuan lawmthu sawiin he hun hi a khar a ni.

Photos can be downloaded from here: Download